ഫുട്ബോർഡിൽ നിന്ന് തെറിച്ചുവീഴാതെ യുവാവിനെ ഒറ്റ കൈകൊണ്ട് പിടിച്ചുനിർത്തി, സ്വകാര്യ ബസ് കണ്ടക്‌ടർക്ക് അഭിനന്ദന പ്രവാഹം.

പന്തളം: ബസിൽ നിന്ന് തെറിച്ചു വീഴാൻ പോയ യാത്രക്കാരനെ ഒറ്റക്കൈ കൊണ്ട് രക്ഷപ്പെടുത്തിയ ബിനു എന്ന ബസ് കണ്ടക്ടറുടെ വീഡിയോ സമൂഹ മാധ്യമങ്ങളിൽ വൈറലായിക്കുകയാണ്. പന്തളം - ചവറ റോഡിലൂടെ ഓടുന്ന ബസ്സില്‍ കാരാളി മുക്കില്‍ വെച്ചാണ് ബസ് കണ്ടക്ടർ ബിനു യാത്രക്കാരനെ രക്ഷിച്ചത്.

മോട്ടോർ വാഹന വകുപ്പ് ഉദ്യോഗസ്ഥർ ഉള്‍പ്പെടെ ബിനുവിനെ വിളിച്ച്‌ അഭിനന്ദിച്ചു. യാത്രക്കാരനെ രക്ഷിക്കാൻ കഴിഞ്ഞതില്‍ അങ്ങേയറ്റം സന്തോഷമുണ്ടെന്ന് ബിനു പറഞ്ഞു. മനോരമ ന്യൂസിനോടായിരുന്നു പ്രതികരണം. ടിക്കറ്റ് എടുത്ത ശേഷം ബാലൻസ് വാങ്ങാൻ വേണ്ടി വാതിലിനോട് ചേർന്ന് നില്‍ക്കുകയായിരുന്നു യാത്രക്കാരൻ. അടുത്ത വളവില്‍ വെച്ച്‌ യാത്രക്കാരൻ തെറിച്ച്‌ പോയപ്പോള്‍ കണ്ടക്ടറുടെ കയ്യില്‍ തട്ടുകയും കണ്ടക്ടർ സമയം പാഴാക്കാതെ രക്ഷപ്പെടുത്തുകയുമായിരുന്നു.

കൊല്ലം മണ്‍റോത്തുരുത്ത് സ്വദേശിയായ ബിനു 8 വർഷത്തോളമായി ഈ ബസ്സിലെ കണ്ടക്ടറാണ്. ഇദ്ദേഹം ഇപ്പോള്‍ താമസിക്കുന്നത് ശാസ്താംകോട്ട തോപ്പില്‍ മുക്കിലാണ്. പെട്ടെന്ന് അപകടം ഉണ്ടായപ്പോള്‍ അറിയാതെ അങ്ങനെ പ്രതികരിച്ചതാണെന്ന് ബിനു പറയുന്നു.

ബിനു മിന്നല്‍ വേഗത്തില്‍ പ്രവർത്തിച്ചത് കാെണ്ടാണ് ഇദ്ദേഹത്തിന്റെ ജീവൻ രക്ഷപ്പെട്ടത് എന്നാണ് സംഭവം കണ്ടവരൊക്കെ പറയുന്നത്. മിന്നല്‍ മുരളി തന്നെയാണ് ഈ കണ്ടക്ടർ എന്നിങ്ങനെയൊക്കെയുള്ള കമന്റുകളാണ് വന്നുകാെണ്ടിരിക്കുന്നത്.