കിളിമാനൂർ: കിളിമാനൂരിൽ കെഎസ്ആർടിസി ബസ്സും കാറും കൂട്ടിയിടിച്ച് ഒരാൾ മരിച്ചു.മറ്റുള്ളവരെ ഗുരുതര പരിക്കുകളോടെ വെഞ്ഞാറമൂട്ടിലെ സ്വകാര്യ ആശുപത്രിയിൽ പ്രവേശിപ്പിച്ചു.
എംസി റോഡിൽ കിളിമാനൂർ ജംഗ്ഷനിൽ തിരുവനന്തപുരത്ത് നിന്നും പാലക്കാട്ടേക്ക് പോയ കെഎസ്ആർടിസി സൂപ്പർഫാസ്റ്റ് ബസ്സും, കോട്ടയം പാലായിൽ നിന്ന് തിരുവനന്തപുരത്തേക്ക് വന്ന ഹോണ്ട സിറ്റി കാറും നേർക്കുനേർ കൂട്ടിയിടിച്ചായിരുന്നു അപകടം.
ഇന്ന് പുലർച്ചെ രണ്ടു മണിയോടുകൂടി ആയിരുന്നു അപകടം. തകർന്ന കാറിൽ കുടുങ്ങിയ ഡ്രൈവർ ഉൾപ്പെടെയുള്ള ആളുകളെ വെഞ്ഞാറമൂട് അഗ്നിശമനസേന ഹൈഡ്രോളിക്ക്‌ കട്ടർ ഉപയോഗിച്ച് പുറത്തെടുത്ത് വെഞ്ഞാറമൂട്ടിലെ സ്വകാര്യ ആശുപത്രിയിൽ എത്തിച്ചുവെങ്കിലും ഗുരുതരമായി പരിക്കേറ്റ കാർ ഡ്രൈവർ കഴക്കൂട്ടം കാരിയിൽ അശ്വതി ഭവനിൽ അനൂപ്(32) ന് മരണം സംഭവിച്ചിരുന്നു.
കാറിൽ ഉണ്ടായിരുന്ന ശ്യാമള, അനു ജോഗൻ,സലിംകുമാർ,എന്നിവർ ഗുരുതരമായ പരിക്കുകളോടെ വെഞ്ഞാറമൂട്ടിലെ സ്വകാര്യ ആശുപത്രിയിൽ ചികിത്സയിലാണ്. കാർ ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം.
പാലായിൽ ഒരു വിവാഹത്തിൽ പങ്കെടുത്ത് മടങ്ങി വരുമ്പോൾ ആണ് കുടുംബത്തിന് അപകടം സംഭവിച്ചത്.
No comments:
Post a Comment