തിരുവനന്തപുരം: പോലീസിനെ കബളിപ്പിച്ച് രക്ഷപ്പെടാന്‍ ശ്രമിച്ച കൊലക്കേസ് പ്രതിയെ പോലീസ് ഓടിച്ചിട്ട് പിടികൂടി. തിരുവനന്തപുരം വട്ടപ്പാറ വേറ്റിനാട് ചിറക്കോണത്ത് ആര്യ (15) യെ കൊലപ്പെടുത്തിയ കേസിലെ പ്രതി രാജേഷാണ് ഓടി രക്ഷപ്പെടാന്‍ ശ്രമിച്ചത്. തിരുവനന്തപുരം കാട്ടാക്കട കോടതിക്ക് സമീപത്ത് ഇന്ന് രാവിലെയാണ് സംഭവം നടന്നത്.
പ്രതിയെ കാട്ടാക്കട ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കാന്‍ കൊണ്ടുവന്നതായിരുന്നു. വിലങ്ങണിയിച്ചാണ് ഇയാളെ പോലീസ് കൊണ്ടുവന്നത്. മൂത്രമൊഴിക്കണമെന്ന് പ്രതി ആവശ്യപ്പെട്ടപ്പോള്‍ വിലങ്ങ് അഴിച്ചു കൊടുത്തു. ഈ സമയത്താണ് ഇയാള്‍ ഓടി രക്ഷപ്പെടാന്‍ ശ്രമിച്ചത്. പോലീസുകാര്‍ പിന്നാലെ ഓടിയപ്പോള്‍ ഒരു വീടിന്‍റെ ശുചിമുറിയില്‍ കയറി ഒളിച്ചിരിക്കുകയായിരുന്നു രാജേഷ്. തുടര്‍ന്ന് പോലീസ് ഇയാളെ പിടികൂടി.
മുമ്പ് നെയ്യാര്‍ ഡാം ഓപ്പണ്‍ ജയിലില്‍ നിന്നും ചാടിയ രണ്ട് പ്രതികളില്‍ ഒരാളാണ് ഇയാള്‍. 2020 ഡിസംബര്‍ 23-നായിരുന്നു ഇയാള്‍ ജയിലില്‍നിന്ന് രക്ഷപ്പെട്ടത്. പിന്നീട് 2022 ഒക്ടോബറിലാണ് കര്‍ണാടകയില്‍ കൊല്ലൂരിനടുത്തുള്ള മുദൂരില്‍ നിന്നാണ് ഇയാളെ പോലീസ് പിടികൂടിയത്. ഇവിടെ ടാപ്പിങ് തൊഴിലാളിയായി കഴിയുകയായിരുന്നു. ഇയാളെപ്പറ്റിയുള്ള വാര്‍ത്ത കണ്ട് ഒപ്പം ജോലി ചെയ്യുന്ന മലയാളികള്‍ പോലീസിനെ അറിയിക്കുകയായിരുന്നു. തുടര്‍ന്ന്, സ്ഥലക്കച്ചവടക്കാര്‍ എന്ന രീതിയില്‍ വേഷംമാറി കര്‍ണാടക പോലീസ് രാജേഷിനെ സമീപിച്ചു. തുടര്‍ന്ന് രാജേഷ് അല്ലേ എന്ന് പോലീസ് ചോദിച്ചു. ആദ്യം ഒന്നും സമ്മതിച്ചില്ലെങ്കിലും ഒപ്പമുണ്ടായിരുന്ന മലയാളിയായ എഎസ്‌ഐ എം.സി. ജോസ് തനിക്ക് എല്ലാം അറിയാമെന്ന് പറഞ്ഞപ്പോള്‍ പ്രതി കീഴടങ്ങുകയായിരുന്നു.
പത്താക്ലാസ് വിദ്യാര്‍ഥിനിയെ കൊലപ്പെടുത്തിയ കേസില്‍ 2013 ജനുവരിയിലാണ് രാജേഷിനെ തിരുവനന്തപുരം പ്രിന്‍സിപ്പല്‍ സെഷന്‍സ് കോടതി വധശിക്ഷയ്ക്ക് വിധിക്കുന്നത്. തിരുവനന്തപുരം ജില്ലാ പ്രിന്‍സിപ്പല്‍ ജഡ്ജ് ബി.സുധീന്ദ്രകുമാറാണ് ശിക്ഷ വിധിച്ചത്. ബലാത്സംഗം, ഭവനഭേദനം, കൊലപാതകം, ആള്‍മാറാട്ടത്തിലൂടെ ചതിക്കല്‍ എന്നീ കുറ്റകൃത്യങ്ങള്‍ക്കാണ് ശിക്ഷ. ഇന്ത്യന്‍ ശിക്ഷാനിയമം 302 പ്രകാരം വധശിക്ഷ, 376 ജീവപര്യന്തം കഠിനതടവ്, 392, 449, 419 എന്നീ വകുപ്പുകള്‍ പ്രകാരം 23 വര്‍ഷം കഠിനതടവ് എന്നിങ്ങനെയാണ് വിധി.
2012 മാര്‍ച്ച് ആറിനായിരുന്നു വട്ടപ്പാറയ്ക്ക് സമീപം വേറ്റിനാട്എന്ന് കൊച്ചു ഗ്രാമത്തെ ഞെട്ടിച്ചകേസിനാസ്പദമായ സംഭവംനടന്നത്.. ഓട്ടോറിക്ഷ ഡ്രൈവറായ
വീരണകാവ് മെയിലോട്ടുകുഴി ചന്ദ്രാമൂഴി ക്രൈസ്റ്റ് ഭവനില്‍ രാജേഷ് വേറ്റി നാട് താമസിക്കുന്ന സഹോദരിയുടെ വീട്ടിലേക്ക് വരവേ ആര്യയുടെ വീടിനുസമീപം ഓട്ടം പോവുകയും ആര്യയുടെ വീടിനു മുന്നില്‍ വച്ച് ഓട്ടോറിക്ഷ റോഡരികിലെ കുഴിയില്‍ വീഴുകയായിരുന്നു. ഓട്ടോറിക്ഷ കുഴിയില്‍ നിന്നും കയറ്റുന്നതിനായി രാജേഷ് ആര്യയുടെയും അതുവഴി വന്ന പ്ലസ് വണ്‍ വിദ്യാര്‍ഥിനിയും കേസിലെ രണ്ടാം സാക്ഷിയുമായ വിദ്യയുടെയും സഹായം തേടിയിരുന്നു. ഓട്ടോറിക്ഷ കരയ്ക്കുകയറ്റിയ ശേഷം പരിസരത്ത് ആരുമില്ലെന്ന് മനസിലാക്കിയ പ്രതി സ്‌ക്രൂ ഡ്രൈവര്‍ വാങ്ങാനെന്ന വ്യാജേന ആര്യയുടെ വീട്ടില്‍കയറി കുട്ടിയെ ഉപദ്രവിച്ചവ് കൊലപ്പെടുത്തിയശേഷം സ്വര്‍ണാഭരണങ്ങളുമായി കടന്നുകളഞ്ഞു എന്നാണ് പ്രോസിക്യൂഷന്‍ കേസ്.
രാജേഷിന്‍റെ ഓട്ടോറിക്ഷയില്‍ ഉണ്ണിയേശുവിന്‍റെ ചിത്രം പതിപ്പിച്ചിരുന്നതും രാജമ്മ എന്നെഴുതിയിരുന്നതും അന്വേഷണത്തിനു വഴിത്തിരിവായി. കേസിലെ സാക്ഷിവിസ്താരത്തിലും ഇത് നിര്‍ണായകമായിരുന്നു. കൃത്യം നടക്കുമ്പോള്‍ ആര്യയുടെ വീടിനു സമീപത്തെ പ്രണവ് (15) എന്ന വിദ്യാര്‍ഥി അതുവഴി പോയിരുന്നു. ഈ സമയം ആര്യയുടെ വീടിനു മുന്നില്‍ ഉണ്ണിയേശുവിന്‍റെ ചിത്രം പതിപ്പിച്ച രാജമ്മ എന്ന പേരിലുള്ള ഓട്ടോറിക്ഷ പാര്‍ക്കു ചെയ്തിരുന്നതായും വീടിന്‍റെ മുന്‍വശത്തെ വാതില്‍ പകുതി തുറന്നിരിക്കുന്നതായും പോലീസില്‍ വിവരം നല്‍കി.
No comments:
Post a Comment