കൊല്ലം: പത്തനാപുരത്ത് ബാങ്ക് ഉദ്യോഗസ്ഥ ആത്മഹത്യ ചെയ്തതില്‍ സുഹൃത്തായ യുവാവിനെ പോലീസ് അറസ്റ്റു ചെയ്തു. ബന്ധുക്കള്‍ക്കു പോലും പരാതിയില്ലാതെ എഴുതിതളളിയ കേസിലാണ് പത്തനാപുരം പോലീസിന്‍റെ അന്വേഷണം വഴിത്തിരിവായത്. പത്തനാപുരത്ത് സ്വകാര്യബാങ്കില്‍ അസിസ്റ്റന്‍റ് മാനേജരായിരുന്ന അഞ്ചല്‍ സ്വദേശിനി സൈമാ സലീം ആത്മഹത്യ ചെയ്തതിലാണ് സൈമയുടെ സുഹൃത്ത് അഞ്ചൽ അഗസ്ത്യക്കോട് സ്വദേശി വി മുഗേഷിനെ പത്തനാപുരം പോലീസ് അറസ്റ്റ് ചെയ്തത്.
ഭാര്യയുമായി പിണക്കത്തിലായിരുന്ന മുഗേഷ് മുപ്പത്തിയൊന്നുകാരിയായ സൈമയുമായി അടുപ്പമായി. വിവാഹവാഗ്ദാനം നല്‍കി യുവതിയുടെ സ്വര്‍ണവും പണവും കൈക്കലാക്കുകയായിരുന്നു. വിവാഹത്തില്‍ നിന്ന് മുഗേഷ് പിന്മാറിയതോടെയായിരുന്നു ആത്മഹത്യ. പത്തനാപുരം ജനതാ ജംഗ്ഷനിലെ വാടകവീട്ടില്‍ ഒക്ടോബര്‍ മുപ്പതിനാണ് സൈമയെ മരിച്ചനിലയില്‍ കണ്ടത്.
ഒറ്റയ്ക്ക് താമസിക്കുന്ന സൈമയുടെ ആത്മഹത്യയിൽ ആദ്യം സംശയം ഒന്നും തോന്നിയിരുന്നില്ലെന്നാണ് അന്വേഷണ ഉദ്യോഗസ്ഥൻ പറയുന്നത്. മരണത്തിന് മുമ്പ് സൈമ സലീം മാതാപിതാക്കളെ വിളിച്ചിരുന്നു. പിന്നീട് സംശയം തോന്നിയ ഇവർ മകളുടെ വീടിന് തൊട്ടടുത്ത് താമസിക്കുന്നയാളെ വിളിച്ച് വീട്ടിൽ നോക്കാൻ ആവശ്യപ്പെടുകയായിരുന്നു.
വീട് അടച്ചിട്ടിരിക്കുന്ന നിലയിലാണ് ആദ്യം കണ്ടത്. സംശയം തോന്നി വാതിൽ ചവിട്ടിപ്പൊളിച്ച് നോക്കിയപ്പോഴാണ് തൂങ്ങി നിൽക്കുന്നത് കണ്ടത്. ആ സമയത്ത് ജീവനുണ്ടായിരുന്നു. ആശുപത്രിയിലെത്തിയശേഷമാണ് മരണം സംഭവിച്ചത്. പോസ്റ്റ് മോർട്ടം റിപ്പോർട്ടിലും സംശയത്തക്ക കാര്യങ്ങൾ ഒന്നും ഉണ്ടായിരുന്നില്ല. യുവതിക്കൊപ്പം ജോലി ചെയ്തിരുന്ന മറ്റു ജീവനക്കാരുടെ മൊഴിയിൽ നിന്നാണ് കേസിൽ വഴിത്തിരിവ് ഉണ്ടാകുന്നത്.
യുവതിയ്ക്ക് ഒരു ഡയറിയുണ്ടെന്ന് വിവരം ലഭിച്ചിരുന്നു. എന്നാൽ വീട്ടിൽ നടത്തിയ പരിശോധനയിൽ ഡയറി കിട്ടിയിരുന്നില്ല. ആത്മഹത്യ കുറിപ്പും ഉണ്ടായിരുന്നില്ല. മൂന്ന് ദിവസം കഴിഞ്ഞ് നടത്തിയ പരിശോധനയിലാണ് അലമാരയിൽ വസ്ത്രത്തിനിടയിൽ വച്ച നിലയിൽ ഡയറി കണ്ടെത്തിയത്. ഡയറിയിൽ ഏറ്റവും അവസാനത്തെ പേജിനുള്ളിൽ നിന്നാണ് കത്ത് ലഭിച്ചത്. അതിൽ വ്യക്തമായി പേര് എഴുതിയിട്ടുണ്ടായിരുന്നെന്നും പോലീസ് വ്യക്തമാക്കി.
ലാപ്ടോപ്, പാസ്പോർട്ട്, സ്വർണം എന്നിവ മുഗേഷിന് കൊടുത്തിട്ടുണ്ട്. അയാളുടെ വീട് പരിശോധിച്ചാൽ കിട്ടുമെന്നും കത്തിലുണ്ടായിരുന്നു. പ്രതിയുമായുള്ള ബന്ധവും അതിലുണ്ടായിരുന്നു. കത്ത് ലഭിച്ചതിന് പിന്നാലെ വിശദമായി അന്വേഷണം നടത്തിയാണ് ഇയാളെ പിടികൂടിയത്. സൈബര്‍ സെല്ലിന്‍റെ സഹായത്തോടെ യുവതിയുടെ ഫോണ്‍ സന്ദേശങ്ങള്‍ എടുത്തപ്പോഴാണ് മുഗേഷ് കുടുങ്ങിയത്.
യുവതിയുടെ ഇരുപതു പവന്‍ സ്വര്‍ണവും ലാപ്ടോപ്പും മുഗേഷിന്‍റെ വീട്ടില്‍ നിന്ന് കണ്ടെത്തി. സൈമയ്ക്ക് താമസിക്കാന്‍ പത്തനാപുരത്ത് വീട് വാടയ്ക്ക് എടുത്ത് നല്‍കിയതും മുഗേഷായിരുന്നു. മുഗേഷ് ഇവിടെ വന്നുപോകുന്നതും പതിവായിരുന്നുവെന്ന് പോലീസ് നടത്തിയ അന്വേഷണത്തില്‍ തെളിഞ്ഞു.
No comments:
Post a Comment