കടപ്പുറത്ത് മൃതദേഹം കരക്കടിഞ്ഞെന്ന് വിവരം; പരിശോധിക്കാൻ എത്തിയ പോലീസ് കണ്ടത് മരിച്ചുകിടക്കുന്ന സഹപ്രവർത്തകനെ

ആലപ്പുഴ : ആലപ്പുഴ കടപ്പുറത്ത് പോലീസ് ഉദ്യോഗസ്ഥന്‍റെ മൃതദേഹം കരക്കടിഞ്ഞു. എ ആ‍ർ ക്യാമ്പിലെ എഎസ്ഐ ഫെബി ഗോണ്‍സാലസിന്‍റെ മൃതദേഹമാണ് കണ്ടെത്തിയത്. ആലപ്പുഴ കാഞ്ഞിരംചിറ സ്വദേശിയാണ് മരിച്ച ഫെബി ഗോണ്‍സാലസ്. 46 വയസായിരുന്നു. ഇന്ന് രാവിലെ 8.30 ഓടെയാണ് മൃതദേഹം കടപ്പുറത്ത് കണ്ടെത്തിയത്.

ഇന്നലെ വൈകിട്ട് വരെ ഫെബി ഗോണ്‍സാലസ് ആലപ്പുഴ ക്യാമ്പിലുണ്ടായിരുന്നു. രാവിലെ എട്ടരയോടെ ആലപ്പുഴ ഇഎസ്ഐ ജങ്‌ഷന്‌ തെക്കുവശം വിജയ് കമ്പനിക്ക് സമീപത്തെ കടപ്പുറത്താണ് മൃതദേഹം കണ്ടെത്തിയത്. വിവരം ലഭിച്ച പോലീസ് പരിശോധനയ്ക്കെത്തിയപ്പോഴാണ് ഫെബി ഗോൺസാലസിന്‍റെ മൃതദേഹം ആണ് ഇതെന്ന് തിരിച്ചറിഞ്ഞത്. പോലീസ് സംഘം ഇൻക്വസ്റ്റ് നടത്തി.

ഗോൺസാലസിന്‍റേത് ആത്മഹത്യയാണെന്നാണ് പ്രാഥമിക നിഗമനം. ആലപ്പുഴ സൗത്ത് പോലീസ് അന്വേഷണം ആരംഭിച്ചു. ശനിയാഴ്ച വൈകീട്ടുവരെ ഇയാൾ എആർ ക്യാമ്പിൽ ഡ്യൂട്ടിയിലുണ്ടായിരുന്നെന്ന് പോലീസ് പറഞ്ഞു.

ക്യാമ്പിലെന്തെങ്കിലും പ്രശ്നം ഉള്ളതായി അറിയില്ലെന്ന് ക്യാമ്പ് കമാന്‍റന്‍റ് പ്രതികരിച്ചതായി ഏഷ്യാനെറ്റ് ന്യൂസ് റിപ്പോർട്ട് ചെയ്തു. മൃതദേഹത്തിൽ പരിക്കുകളില്ലെന്നാണ് റിപ്പോർട്ട്. മൃതദേഹം ആലപ്പുഴ മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.