ഷവർമ കഴിച്ച് വിദ്യാർത്ഥിനി മരിച്ചു, 15 പേർ ആശുപത്രിയിൽ

 കഴിഞ്ഞ മാസം ഒടുവിൽ ചെറുവത്തൂരിലെ ഒരു കടയിൽ നിന്നും ഷവർമ കഴിച്ച് അവശനിലയിൽ ആയതിനെ തുടർന്ന് ചികിത്സയിൽ കഴിഞ്ഞ പെൺകുട്ടിയാണ് ഇന്ന് മരിച്ചത്. ഭക്ഷ്യവിഷബാധയാണ് മരണകാരണമെന്നാണ് നിഗമനം

കാസർകോട് (Kasaragod): ഷവർമ കഴിച്ച് അസ്വസ്ഥത അനുഭവപ്പെട്ട ഒരു വിദ്യാർത്ഥിനി മരിച്ചു. കണ്ണൂർ കരിവെള്ളൂർ പെരളം സ്വദേശിനി ദേവനന്ദ (16)ആണ് മരിച്ചത്. കരിവള്ളൂർ എവിഎസ്‍ജി വിദ്യാർത്ഥിനിയാണ് ദേവനന്ദ. ഷവർമ കഴിച്ച് അസ്വസ്ഥരായ 15 ഓളം വിദ്യാർത്ഥികളെ ചെറുവത്തൂരിലെ സർക്കാർ ആശുപത്രിയിലും പിന്നീട് കാഞ്ഞങ്ങാട് ജില്ലാശുപത്രിയിലേക്കും മാറ്റി.

ഇതിൽ ഒരാളുടെ സ്ഥിതി ഗുരുതരമാണ്. ഏപ്രിൽ 29ന് ചെറുവത്തുരിലെ കൂൾബാറിൽ നിന്ന് ഷവർമ കഴിച്ചവർക്കാണ് അസ്വസ്ഥത അനുഭവപ്പെട്ടത്. ഭക്ഷ്യ വിഷബാധയേറ്റവരെല്ലാം ചെറുവത്തൂരിലെ സ്വകാര്യ ട്യൂഷൻ സെൻ്ററിലെ വിദ്യാർഥികളാണ്. ഐഡിയൽ കൂൾ ബാറിൽ നിന്നാണ് ഇവർ ഷവർമ കഴിച്ചത്. സംഭവത്തെ തുടർന്ന് നടത്തിയ അന്വേഷണത്തിൽ ഐഡിയൽ കൂൾബാറിന് ലൈസൻസില്ലെന്ന് കണ്ടെത്തി. തുടർന്ന് സ്ഥാപനം സീൽ ചെയ്ത് അടച്ചുപൂട്ടി