ചേര്‍പ്പ് മുത്തുള്ളിയില്‍ യുവാവ് സഹോദരനെ കൊന്ന് കുഴിച്ചു മൂടി. മുത്തുള്ളി സ്വദേശി കെ. ജെ ബാബു (27) വാണ് കൊല്ലപ്പെട്ടത്. സഹോദരന്‍ കെ.ജെ സാബു (24) വിനെ പൊലീസ് കസ്റ്റഡിയിലെടുത്തു.
ബാബു മദ്യപിച്ച് ബഹളം വെച്ചതാണ് കൊലപാതകത്തിന് കാരണമെന്ന് സാബു പറഞ്ഞു. കഴിഞ്ഞ ശനിയാഴ്ച്ചയായിരുന്നു സംഭവം. ബാബുവിനെ കാണാനില്ലെന്ന് കാണിച്ച് മാതാപിതാക്കള്‍ രണ്ട് ദിവസം മുമ്പ് പൊലീസില്‍ പരാതി നല്‍കിയിരുന്നു. സംഭവത്തില്‍ സംശയാസ്പദമായി മൂന്ന് വാഹനങ്ങള്‍ പിടിച്ചെടുത്തു.
സമീപ പ്രദേശത്ത് നിന്നും പുല്ല് ഇളകി കിടക്കുന്നത് കണ്ടാണ് നാട്ടുകാരില്‍ ഒരാള്‍ പൊലീസില്‍ വിവരം അറിയിച്ചത്. തുടര്‍ന്ന് പൊലീസ് നടത്തിയ തെരച്ചിലിലാണ് മൃതദേഹം കണ്ടെത്തിയത്. മരിച്ച ബാബു കൈയ്യില്‍ പച്ച കുത്തിയിരുന്നു. ഇങ്ങനെയാണ് മൃതദേഹം ബാബുവിന്റേതാണെന്ന് പൊലീസ് ഉറപ്പിച്ചത്. സഹോദരന്റെ തിരോധാനത്തില്‍ പൊലീസ് അന്വേഷണം ആവശ്യപ്പെട്ട് പ്രതി സാബു പൊലീസ് സ്റ്റേഷനില്‍ എത്തിയിരുന്നു. അന്വേഷണം തന്നിലേക്ക് എത്താതിരിക്കാനുള്ള ശ്രമമായിരുന്നു ഇത്തരം പ്രവര്‍ത്തികള്‍ എന്നാണ് സൂചന. നെഞ്ച് വേദനയെ തുടര്‍ന്ന് ഇവരുടെ അമ്മ ആശുപത്രിയില്‍ ചികിത്സയിലാണ്.
No comments:
Post a Comment