കൊല്ലം: മദ്യം ചോദിച്ചിട്ട് നല്‍കാത്തതിന് യുവാവിന്റെ മുഖത്ത് ആസിഡ് ഒഴിച്ച പ്രതിയെ പൊലീസ് പിടികൂടി. കൊല്ലം കോട്ടുക്കല്‍സ്വദേശി ഉദയകുമാറിനെയാണ് പൊലീസ് അറസ്റ്റ് ചെയ്തത്.
ആസിഡ് മുഖത്ത് വീണ കോട്ടുക്കല്‍ സ്വദേശി വിപിന് ഭാഗികമായി കാഴ്ച നഷ്ടപ്പെട്ടിട്ടുണ്ട്. ഇയാള്‍ ഗുരുതരമായി പരിക്കേറ്റ് ആശുപത്രിയില്‍ ചികിത്സയിലാണ്.
ഞായറാഴ്ച വൈകിട്ട് മൂന്ന് മണിയോടെയാണ് സംഭവം. കോട്ടുക്കലില്‍ ഒഴിഞ്ഞ സ്ഥലത്ത് ഇരുന്ന് മദ്യപിക്കുകയായിരുന്നു വിപിനും സുഹൃത്തും. ആ സമയം അതുവഴി വന്ന ടാപ്പിംഗ് തൊഴിലാളിയായ ഉദയകുമാര്‍ തനിക്കും മദ്യം വേണമെന്ന് ആവശ്യപ്പെട്ടു. എന്നാല്‍ കൊടുക്കാന്‍ വിപിന് തയ്യാറായില്ല. ഇതോടെ വീട്ടിലേക്ക് പോയ ഉദയകുമാര്‍ ഒരു ചെറിയ കുപ്പിയില്‍ റബര്‍ ഷീറ്റ് നിര്‍മാണത്തിന് ഉപയോഗിക്കുന്ന ആസിഡുമായി മടങ്ങിവരികയും അത് വിപിന്റെ മുഖത്ത് ഒഴിക്കുകയുമായിരുന്നു.
വിപിനെ ഉടന്‍ തന്നെ തിരുവനന്തപുരം മെഡിക്കല്‍ കോളേജില്‍ പ്രവേശിപ്പിച്ചെങ്കിലും ഒരു കണ്ണിന്റെ പരിക്ക് ഗുരുതരമാണെന്നും ഭാഗികമായി കാഴ്ച നഷ്ടപ്പെട്ടിട്ടുണ്ടാകാമെന്നും ഡോക്ടര്‍മാര്‍ പറഞ്ഞു. സംഭവത്തെ തുടര്‍ന്ന് ഒളിവില്‍ പോയ ഉദയകുമാറിനെ കഴിഞ്ഞ ദിവസം അറസ്റ്റ് ചെയ്ത പൊലീസ് കോടതിയില്‍ ഹാജരാക്കി. കോടതി പ്രതിയെ റിമാന്‍ഡ് ചെയ്തു.
No comments:
Post a Comment