ലിഫ്റ്റ് ചോദിച്ചു കയറിയ ട്രാൻസ്ജെൻഡർ യുവതി ബൈക്ക് യാത്രക്കാരനെ ആക്രമിച്ചു

 

തിരുവനന്തപുരം:   ലിഫ്റ്റ് ചോദിച്ച് കയറിയ ട്രാൻസ്ജെൻഡർ യുവതി ബൈക്ക് യാത്രക്കാരന്റെ തല അടിച്ചുപൊട്ടിച്ചു. ആറ്റിങ്ങൽ ആലംകോട് സ്വദേശി സലിമിന് (47)ആണ് ആക്രമണത്തിൽ പരിക്കേറ്റത്.

 ഇയാളെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.ഞായറാഴ്ച രാത്രി എട്ടോടെ പട്ടം പ്ലാമൂട്ടിലായിരുന്നു സംഭവം. പി.എം.ജിയിൽ നിന്ന് സലിമിന്റെ ബൈക്കിൽ കയറിയ ട്രാൻസ്ജെൻഡർ യുവതി പ്ലാമൂട് ഇറങ്ങാൻ തയ്യാറായില്ല. 

പണം ആവശ്യപ്പെട്ടു. പണമില്ലെന്നും വാഹനത്തിൽനിന്ന്‌ ഇറങ്ങണമെന്നും ആവശ്യപ്പെട്ടതോടെ ചെരുപ്പ് ഊരിയെടുത്ത് സലിമിന്റെ തലയിൽ അടിച്ചു. സലിമിന്റെ തലപൊട്ടി ചോര ഒഴുകിയിട്ടും ആക്രമണം തുടർന്നതോടെ നാട്ടുകാർ ഓടിയെത്തി ട്രാൻസ്ജെൻഡറിനെ പിടികൂടി പോലീസിൽ ഏൽപ്പിക്കുകയായിരുന്നു.