മോഷ്ടിച്ച് കടത്തിക്കൊണ്ടുവന്ന ജീപ്പ് നിയന്ത്രണം തെറ്റി; കഴക്കൂട്ടത്ത് കടയിലേക്ക് ഇടിച്ചുകയറി.

കഴക്കൂട്ടം: മോഷ്ടിച്ച് കടത്തിക്കൊണ്ടുവന്ന ജീപ്പ് നിയന്ത്രണം തെറ്റി വഴിയരികിലെ കടയിലേക്ക് ഇടിച്ചുകയറി. കഴക്കൂട്ടം – ആക്കുളം ദേശീയപാതയിൽ ആറ്റിൻകുഴി ബൈപ്പാസ് ജംഗ്ഷന് സമീപം ഹാജി അലി എന്ന ജ്യൂസ് കടയിലേക്കാണ് ജീപ്പ് ഇടിച്ചുകയറിയത്. അപകടത്തിൽ വൻ നാശനഷ്ടമുണ്ടായെങ്കിലും ആളപായമില്ല. വെള്ളിയാഴ്ച രാത്രി 12.30നായിരുന്നു അപകടം. ജീപ്പ് ഇടിച്ചുകയറി കടയുടെ മുൻവശം പൂർണമായും തകർന്നു. നാലുലക്ഷം രൂപയുടെ നഷ്ടം ഉണ്ടായതായി കടയുടമ പറഞ്ഞു.

 

അപകടം നടന്നയുടനെ ജീപ്പ് ഓടിച്ചിരുന്നയാൾ ഓടി രക്ഷപ്പെട്ടു. എന്നാൽ ഇയാൾക്ക് പരിക്കേൽക്കാൻ സാദ്ധ്യതയുണ്ടെന്ന് പൊലീസ് പറ‍ഞ്ഞു. സമീപത്തെ ആശുപത്രികളിൽ അന്വേഷണം നടത്തിയെങ്കിലും ഇയാളെപ്പറ്റി വിവരമൊന്നും ലഭിച്ചില്ലെന്ന് പൊലീസ് പറഞ്ഞു. വാഹനം കടയിലേക്ക് ഇടിച്ച് കയറുന്നതിന്റെ സി.സി ടിവി ദൃശ്യങ്ങൾ പൊലീസ് ശേഖരിച്ചു. 

കന്യാകുമാരി ജില്ലയിലെ ഇരണിയൽ റെയിൽവേ സ്റ്റേഷനിൽ പാർക്ക് ചെയ്തിരുന്ന ജീപ്പാണിതെന്നും മോഷ്ടിച്ച് കടത്തുന്നതിനിടയിലാണ് അപകടത്തിൽപ്പെട്ടതെന്നും വിവരം ലഭിച്ചിട്ടുണ്ട്.