ആറ്റിങ്ങൽ നഗരസഭ വലിയകുന്ന് 15-ാം വാർഡ് നവഭാരത് റോഡിൽ ദാവൂദ് മൻസിലിൽ 42 കാരനായ സുൽഫിക്കർ ദാവൂദിനെയാണ് മരിച്ച നിലയിൽ കണ്ടെത്തിയത്. ജീർണ്ണാവസ്ഥയിൽ കണ്ടെത്തിയ മൃതശരീരത്തിന് ഏകദേശം മൂന്ന് ദിവസത്തെ പഴക്കമുണ്ടെന്ന് ആറ്റിങ്ങൽ പോലീസ് അറിയിച്ചു.
വാർഡ് കൗൺസിലർ കെ.ശോഭന വിവരമറിയിച്ചതിനെ തുടർന്ന് നഗരസഭാ ചെയർമാൻ എം.പ്രദീപിന്റെ നേതൃത്വത്തിൽ നഗരസഭാ ആരോഗ്യവിഭാഗവും ആറ്റിങ്ങൽ സബ് ഇൻസ്പെക്ടറുടെ നേതൃത്വത്തിൽ പോലീസും സ്ഥലത്തെത്തി. തുടർന്ന് അടച്ചിട്ടിരുന്ന വാതിൽ തുറക്കുകയും മൃതദേഹം അണുവിമുക്‌തമാക്കി മെഡിക്കൽ കോളേജ് മോർച്ചറിയിലേക്ക് മാറ്റി.
ക്വാറന്റൈൻ കാലാവധി പൂർത്തിയാക്കി ഈ മാസം 10-ാം തീയതി വീട്ടിലെത്തിയ ഇയാൾ തുടർന്നുള്ള കരുതൽ നിരീക്ഷണം വീട്ടിൽ തുടരാൻ വിമുഖത കാട്ടിയിരുന്നെന്നും നാട്ടുകാർ ആരോപിച്ചു. മദ്യത്തിനടിമയായിരുന്ന ഇയാളുടെ രണ്ടാം വിവാഹ ജീവിതവും കലഹത്തിലായിരുന്നു. ആദ്യ വിവാഹത്തിൽ ഒരു കുട്ടിയും രണ്ടാമത്തെ ബന്ധത്തിൽ രണ്ട് കുട്ടികളുടെയും അച്ഛനാണിയാൾ. ഗൾഫിൽ നിന്ന് നാട്ടിലെത്തിയ ശേഷം ഇയാൾ ഒറ്റക്കാണ് വീട്ടിൽ താമസിച്ചിരുന്നത്.
നഗരസഭാ ആരോഗ്യ വിഭാഗം കെട്ടിടവും പരിസരവും അണുവിമുക്‌തമാക്കി. ഹെൽത്ത് ഇൻസ്പെക്ടർ എസ്.എസ്. മനോജ്, ജെ.എച്ച്.ഐ സിദ്ദീഖ്, ആശാവർക്കർ ബിന്ദുലാൽ, ഇല്ല്യാസ്, അജിൽ മണിമുത്ത് തുടങ്ങിയവരുടെ നേതൃത്വത്തിൽ പ്രദേശവാസികൾക്കുള്ള ബോധവൽക്കരണവും നടത്തി.
No comments:
Post a Comment