ഒരിലയില്‍ നിന്ന് ഉണ്ണുന്ന സൗഹൃദം; പാപ്പാന്റെ പൊതിച്ചോറില്‍ നിന്നും ആനയും- വിഡിയോ വൈറല്‍

ഒരിലയില്‍ നിന്നും ഭക്ഷണം കഴിക്കുന്ന ആനയുടേയും പാപ്പാന്റേയും വിഡിയോയാണ് ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്. ആനച്ചോറ് കൊലച്ചോറ് എന്ന ചൊല്ലിനെ തിരുത്തുകയാണ് ഈ സൗഹൃദം. സമൂഹമാധ്യമങ്ങളില്‍ വൈറലാവുകയാണ് ഹൃദയം തൊടുന്ന ഈ സൗഹൃദത്തിന്റെ വിഡിയോ.

കൊമ്പന്റെ സമീപത്തിരുന്ന് ഇലയില്‍ പൊതിഞ്ഞുകൊണ്ടുവന്ന ഭക്ഷണം കഴിക്കുകയാണ് പാപ്പാന്‍. ഇതെല്ലാം നോക്കിയും കണ്ടും ആനയും ഒപ്പമുണ്ട്. ആനയ്ക്ക് കഴിക്കാനുള്ള ഓലയും സമീപത്തുണ്ട്. എന്നാല്‍ പാപ്പാന്‍ കഴിക്കുന്നത് കണ്ട് തുമ്പിക്കൈ നീട്ടി പൊതിയില്‍ നിന്ന് കൊമ്പനും കഴിക്കാന്‍ തുടങ്ങി.

പാപ്പാന്‍ ഒരു ഉരുള കഴിക്കുമ്പോള്‍ അവനും അതേ ഇലയില്‍ നിന്ന് ഒരുരുള കഴിക്കും. പാപ്പാന്‍ നല്‍കിയിട്ടല്ല കഴിക്കുന്നത്. സ്വയം എടുത്ത് കഴിക്കുകയാണ്. തന്റെ പാത്രത്തില്‍ നിന്ന് ആന കഴിക്കുന്നുണ്ടെന്ന് പോലും ശ്രദ്ധിക്കാതെ പാപ്പാനും ഭക്ഷണം കഴിച്ചുകൊണ്ടേ ഇരുന്നു.