വ്യാപാര നിയമങ്ങള്‍ കര്‍ശനമായ ദുബായില്‍ വ്യാജ ഉല്‍പ്പന്നങ്ങള്‍ രാജ്യത്തിലേക്ക് എത്തിക്കുന്നതും കടകളിൽ വില്‍പ്പന നടത്തുന്നതും അത്ര എളുപ്പമല്ല. ഈ സാഹചര്യത്തിലാണ് ഓണ്‍ലൈനിലൂടെ തട്ടിപ്പുകാര്‍ രംഗത്തെത്തിയത്. നിലവാരം കുറഞ്ഞതും വ്യാജ ഉല്‍പ്പന്നങ്ങളും ഓണ്‍ലൈനിലൂടെ സുലഭമായി ദുബായിലെത്തുന്നുവെന്ന് കാണിച്ച് വഞ്ചനയ്ക്കിരയായ നിരവധി പേര്‍ പരാതിയുമായി രംഗത്തെത്തിയിരുന്നു. ബാഗുകള്‍, സുഗന്ധ ദ്രവ്യങ്ങള്‍, വാച്ചുകള്‍, സൗന്ദര്യവര്‍ധക വസ്തുക്കള്‍ തുടങ്ങിയവയുടെ വ്യാജ ഉല്‍പ്പന്നങ്ങള്‍ ബ്രാന്റ് പേരുകളിലാണ് ഇവര്‍ വില്‍പ്പന നടത്തിയിരുന്നത്. ഇതേത്തുടര്‍ന്ന് നടത്തിയ അന്വേഷണത്തിലാണ് ഇത്തരം നിരവധി സമൂഹ മാധ്യമ അക്കൗണ്ടുകളും വെബ്സൈറ്റുകളും ആളുകളെ പറ്റിക്കുകയാണെന്ന് അധികൃതര്‍ക്ക് ബോധ്യമായത്.
തട്ടിപ്പുകാര്‍ രാജ്യത്തിന് പുറത്തായതിനാല്‍ അവര്‍ക്കെതിരായ നിയമനടപടികള്‍ എളുപ്പമല്ലെന്നതിനാലാണ് സൈറ്റുകള്‍ തന്നെ അടച്ചുപൂട്ടാന്‍ അധികൃതര്‍ തീരുമാനിച്ചത്. വിവിധ ഉല്‍പ്പന്നങ്ങളുടെ ബ്രാന്റ് കമ്പനികളുമായി സഹകരിച്ചായിരുന്നു നടപടി. സുരക്ഷിതമായി വ്യാപാരം നടത്താനാവുന്ന കേന്ദ്രം എന്ന നിലയില്‍ ഉപഭോക്താവിന്റെ അവകാശങ്ങള്‍ സംരക്ഷിക്കപ്പെടണമെന്ന നിര്‍ബന്ധ ബുദ്ധിയാണ് ഇത്തരമൊരു നടപടിക്ക് പിന്നിലെന്ന് ദുബായ് സാമ്പത്തിക വികസന വകുപ്പ് ഡയറക്ടര്‍ ഇബ്രാഹിം ബെഹ്‌സാദ് അറിയിച്ചു.
വ്യാജ ഉൽപന്നങ്ങൾ വിൽക്കുന്ന സമൂഹ മാധ്യമങ്ങളിലെ അക്കൗണ്ടുകളും വെബ്സൈറ്റുകളും ഞങ്ങളുടെ സംഘം കൃത്യമായി നിരീക്ഷിച്ച ശേഷമായിരുന്നു നടപടിയെന്നും അദ്ദേഹം വ്യക്തമാക്കി. ഇത്തരത്തിൽ വ്യാജ ഉൽപനങ്ങൾ വിൽക്കുന്നത് ശ്രദ്ധയിൽപ്പെട്ടാൽ അധികൃതരെ ഉടൻ തന്നെ അറിയിക്കണമെന്നും ഇബ്രാഹിം ബെഹ്‌സാദ് പറഞ്ഞു. ഇത്തരം ഉൽപ്പന്നങ്ങളുടെ വിൽപ്പന ഉപഭോഗ്താക്കളുടെ സുരക്ഷയെയും ആരോഗ്യത്തെയും മോശമായി ബാധിക്കുമെന്നും അദ്ദേഹം കൂട്ടിച്ചേർത്തു. ഇതുമായി ബന്ധപ്പെട്ട വിവരങ്ങൾ അറിയിക്കാൻ 600545555 എന്ന നമ്പറോ @dubai consumers എന്ന സമൂഹമാധ്യമ അക്കൗണ്ടോ ഉപയോഗിക്കാമെന്നും ഇബ്രാഹിം ബെഹ്‌സാദ് വ്യക്തമാക്കി.
No comments:
Post a Comment